شكوك فمشاركة لاعبات ألمانيات ضد المغرب والمدربة ديالهم كتهرب من الجواب.. واش خطة منها أم الألمانيات كيعانيو؟

كتحوم الشكوك هول مشاركة ثلاثي المنتخب الألماني للسيدات لينا أوبردورف، ومارينا هيجيرينج، وشويكي نوسكن، فماتش غدا الاثنين أمام المنتخب المغربي النسوي، ضمن الجولة الأولى من كأس العالم للسيدات 2023، بأستراليا ونيوزيلاند.
وتهربت مارتينا فوس تيكلينبورج، مدربة المنتخب الألماني، خلال الندوة الصحافية اللي كتسبق ماتش المغربيات والألمانية، (تهربت) من الجواب عن إمكانية مشاركة اللاعبات لينا أوبردورف، ومارينا هيجيرينج وشويكي نوسكن، من عدمها فماتش غدا.
وقالت المدربة الالمانية: "ما غندويش على الفريق اليوم، اللي نقدر نقول لن هو أن كل اللاعبات غيكونو في فلاليست المنتخب د الماتش، وحتى التشكيلة ما غنقول عليها والو".
وحسب آخر التقارير الإعلامية الألمانية الأخيرة فمن المستبعد مشاركة لاعبة وسط التيران هيجيرينج مولات الخبرة، حيث كانت غير كتجري بوحدها فالتداريب بسبب الإصابة اللي عندها فالطابور، وحتى شويكي نوسكن الاحتياطية ديالها كانت دايرة الثلج وفاصمة على ركبتها، بسبب مشكل ليكامون، ولكن شاركت فالتداريب الجماعية.
أما اللاعبة د وسط التيران أوبردورف ما قدرتش تكمل التداريب مع المنتخب، بسبب الإصابة اللي عندها فالفخذ ديالها، وراه أوبردورف كتعتبر من أهم لاعبات المنتخب الألماني.