الحاج بايطاس الوزير الضعيف فالحكومة..نتا فاشل فالتواصل و"مافيدكش" فالعلاقات مع البرلمان والوزارة ماشي ديالك باش تبقي تعزل وتعيط لمن بغيتي فالصحافيين لندواتك للي كتنظمهم بملايين المال العام

تبلات الحكومة بشي وزراء ضعاف، داز الجفاف وأزمة التضخم وبقا مزال مجاش التعديل الحكومي لي مطلوب بعد عامين من التدبير الحكومي. تعديل خصو يطير "وزراء ضعاف" وخفاف وعلى رأسهم الوزير بايطاس.
اليوم الوزير بايطاس دار ندوة قدم فيها حصيلة تفاعل الحكومة مع البرلمان، شحال حضرو وشحال من مقترح قانون ووو.. داكشي لي كيتعاود ديما واللي هي خدمة تقنية كاديرها الإدارة، الوزير غير كيتبنا الارقام ويسوقها.
كولشي عارف بلي الوزير ضعيف فالبرلمان، وقعو مشاكل فتمرير مشاريع قوانين بسبب ضعفو وقلة كفاءتو، وقعو مشاكل تقنية وقانونية واللي خلات المعارضة تحكم فبعض اللجن وتحرج الاغلبية، وهادشي كيخلي ديما رئيس مجلس النواب بتجربتو الكبيرة يتدخل ويفك الجرة (مثلا مرسوم ديال هيئة الصيادلة كان فضيحة والسبب هو بايطاس، وغيرها الكثير ماشي موضوعنا هنا).
بالرجوع لهاد الندوة ديال الحصيلة الحكومية فالبرلمان، اختار بايطاس يعيط على الصحفيين لي بغا، اييه يعيط على مواقع بعينها دون غيرها. رد وزارة ديالو وارثها٬ في حين أن وزارتو خصها تعيط للصحفيين اللي متبعة العمل البرلماني والحكومي واللي كيحضرو لندوات المجلس الحكومي، ماشي يعيط غير اللي كيشوفهم "كيشكرو فيه" او صحابو او معارفو.
"كود" العام لي فات كانت من الصحف الأكثر طرحا للأسئلة حسب تحقيق دارتو اليوم 24، تحقيق عرا لوزير بايطاس وكشف ضعفو وبلي مكيستحقش هاد المنصب.
وقال التحقيق إن بايطاس قام ب50 ندوة صحافية منذ تعيينه إلى غاية نهاية دجنبر 2022، بمعدل إجابات ضعيف، حيث لا يحصل جل الصحفيين على أجوبة لأسلئتهم.
وعن الميزانية المرصودة للندوة الصحافية الأسبوعية، قال التحقيق إنها تبلغ 7 مليون سنتيم لندوة واحدة.
7 مليون من المال العام كتمشي لفلوس التواصل الحكومي لي عليه اجماع بلي تواصل فاشل.
دبا دازت عامين خاص يكون تعديل حكومي وكاين بزاف خاصهم يتغيرو واولهم بايطاس.