عميدة اللبؤات: عايشين اجواء عائلية بحال لخواتات والهدف نتأهلو للدور الثاني

قالت عميدة المنتخب المغربي لكرة القدم النسائية صباح اليوم الاحد 23 يوليوز 2023 في ندوة صحافية بالملعب المستطيل بميلبورن باللي المنتخب واجد وباللي خدا الموتيڤاسيون من الاسود واللي داروه فقطر. الشباك وضحات فهاد الندوة اللي كيتجي 24 ساعة على اول ماتش فتاريخ منتخب لعيالات فالمونديال باللي هاد الماتش "مسؤولية" لانو اول منتخب مغربي وعربي كيشارك فالمونديال.
اللعابة باينة متفاءلة وقالت باللي مع اللعابات باغيات يمشيو بعيد فهاد البطولة وباللي دابا كاين تركيز على الفرقة. على امكانياتها. على طاقاتها
الشباك ردات على سؤال على والدها اللي كان لعاب دولي٬ واكدات باللي باباها غادي يكون فرحان فقبرو باللي وصلات ليه. وباللي حمل القميص الوطني مسؤولية وتمنات المنتخب يمشي بعيد فهاد المونديال وباللي لوبجيكتيف هو التأهل للدور الثاني
على حساب هدرتها راه المنتخب مركز والاجواء داخل المجموعة "عائلية بحال لخواتات".
شباك كانت كتهدر بثقة. مدربة مزيان على دورها كعميدة. واضحة كاجوبتها. ثايقة فراسها. كديگاجي هاد الثقة مزيان.