[email protected] رئيس الحكومة الإسبانية، بيدرو سانشيث، ماهدرش فحملتو الإنتخابية إستعدادا لإنتخابات 23 يوليوز الجاي على الجزائر. هدر فمختلف وسائل الإعلام على الوضع الداخلي فإسبانيا بكل قضاياها هدر على الهجرة على الشباب على النساء وعلى السياسات الخارحية لإسبانيا على الحرب فأوكرانيا على الإتحاد الاوروبي على المغرب على نزاع الصحرا على كلشي إلا الجزائر والعلاقات معاها. هاد القلبة لي قلب بيدرو سانشيث على الجزائر ما مفهوماش واخا الهدرة على الجزائر ضروري تكون فالحملة بحكم حضور نزاع الصحرا فأجندة رئيس الحكومة الحالية، وكذا بحكم المستوى لي وصلات ليه العلاقات بين مدريدوالجزائر ما بعد دعم مبادرة الحكم الذاتي، إذ ان الجزائر لغات معاهدة الصداقة وقلصات من تغاونها التجاري مع مدريد ودارت مشاكل لمدريد فيما يخص ملف الطاقة، والأكثر من ذلك تحولات نحو بإيطاليا وخلاتها على رأس إهتماماتها فمجال الطاقة بدل إسبانيا وهادشي دار مشاكل بزاف لسانشيث وهلاه تخت ضغط كبير من طرف الإعلام والرأي العام الإسباني. القلبة لي قلب سانشيث على الجزائر وخلاه ما يهدرش عليها فحواراتو وتصريحاتو سببها واضح وخا الموقف الحكومي الإسباني غادي للتهدئة ووزير الخارجية خوسيه مانويل ألباريس كان كيستعمل مصطلحات دبلوماسية بزاف فيها أن علاقاتنا مزيانة ومستقرة، ولكن هادشي ماشي صحيح واقعيا لأن العلاقات مع الجزائر تضررات بزاف وتحولات لأزمة حقيقة. هاد السبب الواضح هو أنه ما يمكنش ليك لرئيس حكومة إسبانية الجديد أنه يوازن فعلاقاتو مع المغرب والحزائر فنفس الوقت مستحيل، خصوصا فهلد الفترة لي علاقات الرباطوالجزائر تقطعات. ما يمكنش أيضا يقول انه غادي يصلحها لانه بذلك كيأكد بأنه تسبب فتوترها وغادي تكون حجة ليه. أيضا ما يمكنش لسانشيث يتراجع على موقف دعم مبادرة الحكم الذاتي. فهاد الخالة غادي يغضب المغرب لي دار معاه اتفاقيات ويرضي الجزائر وإذا ظار هاد الغلط غادي تزيد تكفاس عليه كثر. هاد الاخطاء دبلوماسي صغير تافه ما يمكنش يديرهم. هاد القلبة لي قالب سانشيث على الجزائر وخلاه ما يجبدهاش سببها أيضا أنه عارف الموقف الجزائري لي طالع للسما بحكم أن نظام العسكر باغي يدخل فالشؤون الداخلية ديال الصبليون. نعتارفو بمغربية الصحرا. ندعمو الحكم الذاتي. داكشي شغلنا، هادشي كتقولو إسبانيا. وفهاد الحالة إذا سانشيث بدا كيتعاطى لملف العلاقات مع الجزائر فراه بحال إلى حدر الراس ليهم، علما بأن إسبانيا كتشوف راسها كدولة أوروبية فمخل قوة أكبر من الجزائر لي كيسحاب ليها انها قادرة تقود العالم گاع مع روسيا والولايات المتحدة والصين. سبب آخر خلا سانشيث يتجاهل الجزائر والحديث عليها هو انه باغي يخفف الضغط عليه من الاعلام الإسباني ومنافسيه، وأيضا أنه عارف شنو قال عبد المجيد تبون فتصريح سابق، فاش قال حنا مع الشعب الاسباني لي خاصو ما يخافش من نقص إمدادات الغاز واختاصر الموقف الإسباني من نزاع الصحراء ف "موقف حكومة سانشيث"، بمعنى أن الشعب الاسباني رافض هاد الموقف من نزاع الصحرا وبمعنى أن تبون ما باغبش حتى يهدر مع سانشيث بسبب الموقف لي خدا ديال دعم مبادرة الحكم الذاتي. الواقعي والدبلوماسي هو أن سانشيث يمكن يخرج فأي لحظة ويهدر على الجزائر ولكن غادي تكون هدرتو عليها فيها لباقة ودبلوماسية دون تقديم وعود ودون تقديم تنازلات أيضا.
