أخنوش راجع يواجه المعارضة فالبرلمان..جلسة مساءلة شهرية ف12 يونيو على "التعليم العالي"

الصداع للي نايض على التعليم العالي مؤخرا والمشاكل لي بين الحركة الشعبية والوزير الحالي عبد اللطيف ميراوي، غادي يتعاود يتجبد هاد المرة فجلسة المساءلة الشهرية لرئيس الحكومة عزيز أخنوش.
وحسب مصادر "كود" فإن مكتب مجلس النواب، قرر فموعد الجلسة الشهرية لمساءلة رئيس الحكومة واللي تحدد فالاثنين 12 يونيو 2023، والموضوع هو التعليم العالي.
يشار بلي فالجلسة السابقة ديال الاسئلة الشفوية، ناض بوليميك بين الوزير البامي ميراوي ونواب من الحركة الشعبية بسباب المشاريع لي كان جاب سعيد امزازي ديال بناء مركبات جامعية فالاقاليم والجهات، واللي وقفها ميراوي.
ميراوي كان هجم بشدة على تدبير امزازي لقطاع التعليم بحيث قال بلي ضيعنا 10 سنين من التعليم العالي ومامشيناش للرقمنة والذكاء الاصطناعي.
دبا كاينا حرب سياسية بين الحركة الشعبية مع الاحرار في شخص رئيس الحكومة ومع البام في شخص ميراوي، حرب فيها بوليميك مزايدات. اتهامات متبادلة وقصف سياسي من هنا ولهيه.