مدرب الأهلي: الرجاء فريق قوي وحنا هدفنا نربحوهم بنتيجة تسهل علينا الروتور بالمغرب

أكد الألمان مارسيل كولر مدرب الأهلي المصري أن الخصم ديالو في ربع نهائي عصبة أبطال إفريقيا الرجاء الرياضي فريق قوي، ولكن هدف المصريين هو تحقيق نتيجة إيجابية فماتش الذهاب غدا السبت بالقاهرة اللي تسهل عليهم الروتور بالمغرب للتأهل إلى دومي فينال المسابقة.
وتحدث مارسيل كولر مدرب الأهلي المصري خلال الندوة الصحافية قبل مواجهة الرجاء وقال: "حنا وجدنا مزيان لماتش الرجاء، وكنعرفو القوة ديالهم وخصوصا الهجومية راه تفرجنا فبزاف ديال ماتشاتهم".
وكمل مدرب الأهلي وقال: "نتمناو يكون الحظ معنا في المباراة، راه الرجاء عندهم كروب زوين من اللاعبين صحاب المهارات وعارفين الماتش ضدهم غيكون صعيب وخصوصا انهم تصدروا المجموعة ديالهم وباغيين يحققوا نتيجة مزيانة فماتش الذهاب هنا بالقاهرة".
وختم مدرب الأهلي المصري وقال: "هدفنا حنا هو نفرحو جمهورنا اللي غيكون حاضر غدا في التيران وتحقيق نتيجة تسهل علينا ماتش الروتور بالمغرب".