كجمولة بنت أبي: واش مانعبرش على رأيي؟

* كجمولة، ياك لاباس؟
** مالاباس، مالاراباس. هاد الشي اللي دارو فيه قوات الأمن المغربية فالعيون خايب بزاف.
* فعلا خايب بزاف. مشاو لتماك يموتو مساكن.
** لا، هوما مشاو لتماك وداروا مجزرة فحق سكان العيون الأصليين.
* بحال الهنود الحمر الأصليين. هاد الشي عندك فشكل الحاجة.
**علاش فشكل؟ حيت كنقول الحق؟
* لا. حيت كتخربقي . واش البوليس والجدارمية والمخازنية وحتى البومبية ماتو منهم تناش ونتي كتقولي لينا مجزرة. مجزرة فحق من؟ فحق رجال الأمن؟
** نتا مافاهمش ولا ماباغيش تفهم .انا من الفيلا ديالي فالرباط كانت كتجيني التقارير أولا بأول على النهب والسرقة، وعلى حماية البوليس المغربي للمستوطنين المغاربة الي هجمو على الديور ديال سكان العيون الأصلين.
* صافي فهمتك.
** شنو فهمتي بالسلامة؟
* نتي باغية تهزي فليساتك الي عطاك الله والمغرب، وتمشي للصبليون تعيشي معا راسك مبرعة فالدار ديال برشلونة اللي عندك تماك. ياكي؟
**باش عقتي بيا؟ عافك، غير قول.
* حيت هاد الخرجة عندك فشكل ونتي مابقيتيش قادرة على حياة المخيمات والبوليساريو. ولفتي كعب غزال والعيشة فالفيلا شفتي راسك عمرك ماغادية تطفريه هنا، قلتي ندير المعارضة من إسبانيا.
** فالحقيقة، معا عييت نتسنا شي نهار يعطيوني شي بوسط ماعطاوني والو، اللهم نجرب اللعيبة تقدر تصدق.
* سيري لهلا يسهل عليك اللا. بالسلامة والعافية.