ماجدولين الادريسي للعيالات: “نوضو تكَعدو ولي كيعجبها شي واحد تمشي تخطبو”

كشفات الممثلة ماجدولين الادريسي جانب من حياتها الشخصية لي دايما كتفضل تخليها بعيدة على الإعلام، وقالت أنها كتآمن بالمساواة وكتطبقها في حياتها، وهادشي لي خلاها تخطب راجلها الأول والثاني.
وقالت في برنامج تلفزي البارح الجمعة، أن هاد الوقت خاص العيالات يخطبو الرجال لي كيعجبوهم وميبقاوش يتسناو المبادرة تكي من الرجال. وأكدات أن راجلها مشات عندو وقالت ليه فاص "كتعجبني وبغيتك"، لكن جاوبها أنها ماشي الستيل ديالو وهي قالت ليه "غادي نتزوج بك"، وبقات حتى تزوجات به وهاد السيمانة كملو 10 سنين ديال الزواج.
ووجهات ماجدولين كلامها للنساء الحاضرات في بلاطو البرنامج وقالت ليهم "ياك كتمشيو للمدرسة وكتلبسو السراول وكضربو تمارة.. ايوا نوضو تكَعدو ولي كيعجبها شي واحد تمشي تخطبو، الا مبغاش يتزوج الله يعونو". (كود)