(قصيدة مهداة الى روح الغالي المناضل الفذ سيدي محمد اشرگي) شحال عيب عليك وعار ايا الموت أيا الكافرة ما شفقت ماحنيتي فينا مادرتي بحسابنا ما رعيتي لينا ماگلت حرام وحشومة على غفلة منا سرقت وخطفت منا ذاك الغالي مول الشان والمرشان سلطان فضالة ولد الكبرة سيدي محمد زين الخوت مول لسمية لعزيزة نواره ساطعة ف سمانا ضي ونجوم فريد مفرد ماله حد مثيل ف السماحة ومحبة الناس آه يا سليل المهدي عبدالرحيم وعمر ف النضال ولوفا والصدق ف الكلمة واليوم من اواجبك وحقك يا فضالة تشدي حق الله تنوحي وتبكي بدموع سخية حر من لجمر على سلطانك اللي ما غدرك ما خانك شحال كنت عنده مفضلة ومشرفة ساكنة ف دواخل گلبه ما باع فيك ما شرى سيرته ف لسان صحبته وناسه مشهودة ونقاوته نقى من الثلج فينا مطبوعة كنت فينا يا الخاوة وباقي فنار ضاوي منور ب الصفا والطيبة شحال كان عفيف وكريم گول غابة والناس حطابة ماباغي مال ما باغي حيوط ما باغي كرسي اللي گاع الخلق عليه تموت تجري وترشي باغي لمحنة تسكن لگلوب باغي العشرة بين لحباب تدوم باغي لمة جيران الحومة ديما تبقى ملمة وملمومة حارب بلارحمة ذياب الليل وصوالح هكذا هو تاريخه شحال مشرف ومزمم بمداد ذهاب مايزول مايتمحا وحنا ونتما يا سيادي عليه شهود حينت كان مسلح برجال كنعت جبال ما تخاف ما ترهب وبالحق تجهر وتنطق آه يا بونا آه يا خونا كنت فينا مول الري وشوار كنت فينا شجرة مظلة علينا من حر صهد الگايلة والشوم وكذاك برودة الگس والصر بلا بيك يا الغالي تفردنا وتيتمنا بقينا سفينة بين لرياح ولمواج تتلاوح لا صاري لا رايس بقينا گافلة تايهة ف الصحاري بلا زطاط بلا گواد آه يا سيدي محمد لفضالي الحر شوگنا ليك عمره ما يتسالا و لا يتبالا ف كلامه وحديثه معنى و فايدة ف سكاته و صمته حكمة فايضة نعزي راسي فيك ونعزي گاع لحباب و العشران اللي صانوا عهدك بلا خديعة بلا بحوط من شلا سنين وعوام عل الدوام معاك حاضرين ناظرين ف سوايع الفرح وكذاك سوايع الگرح آه يا سلطان فضالة وخا ترحل علينا وتغيب انت باقي وانت يا خيي شمس فينا ما عمرها تغيب ما عمرها تغيب ما عمرها تغيب
