«قصيدة مهداة إلى روح والدتي الغالية» الحاجة طامو يحيا لهلالية آش نكول ليك أيا الموت خليتيني بلا حباب بلا خوت واليوم جاتني منك دقة منها ما نوض وطعنة ف ظهر مسمومة منها ما نشفا ما نبرا قاست القلب والروح مع لحشا ف حلك ظلام الليل خطفت مني عمارة الدار اللي كانت ضي عيوني فنار وقنديل يامي ذيك الشريفة ذيك لعزيزة ذيك لفقيرة ذيك لحنينة مولات الري والشوار آش نكول ليك أيا الموت حرمتيني بلا عطفة بلا رحمة من عز كلمة ف حياتي كلمة قوة مي حينت قولة مي ماحلاها ف ريقي ولساني بها نتشافى من علاتي وبها يرتاح ويزيان خاطري علاش أيا الموت خليتي الخاطر بلا خاطر آه يا السلطانة لهلالية بنت بويا أحمد خديم مول الوظيفة صاحبة النجمة ولفجر التسبيح ما يفارق يديها به تذكر وتخرج الورد هي مي لحبيبة بها نفخر فراقها يا ناسي هيدمني ورشاني وغيابها طيح صروف عبار ميزاني عند خروجي كل صبحية نقبل كفوفها ونبوس الراس أنانكول ليها مي وهي تكول لي بصوت حنين يا بويا والشجرة لمظلة علي الله يعطيك لفضل وركاد الظل ومن ذاك الحين لهنا ماخطاني وطريقي نمقية من الشوك ولمحاني آش نكول ليك أيا الموت ما رعيتي ما حنيتي لحالي آش المعمول ف هاذ النار الكادية ف دواخلي عوافي جمار نعزيك أراسي ف راسي حينت ما يحس بالكية غير اللي مكوي بحالي تعانقت وبكيت أنا ولحيوط حينت لحيوط ليها قلب بلا بحوط لميمة يا عشراني كنز رباني سمع وزيد روى اش كالو سيادي هل الحكمة والسر إلا مات باك توسد الركبة وإلا ماتت أمك توسد العتبة هاذي وصيتي ليك ياغافل تهلا ف لميمة ماحدها حداك بوس لقدام وديرها ف عينيك جنة مقامك حقيقة ميقنة ولا غيرت خاطرها وسافرت عليك ما تنفعك ندامة ولا دموع العين آه يالسلطانة لهلالية ف يوم من ليام مشيت أنا ولميمة عند الطبيب نصحها وأمرها تفطر رمضان ضحكت وطيحت شي دمعات وكالت ليه بصوت حكيم موت وحدة كاينة والخوف علاش يا الغالية بنت الغالي الحافظة شلا مثول وقصايد صوفية كلها نوار شارقة وشموع مضوية لكل من تاه ساح وتجلى ف دروب مظلامة بلا رجعية آه يا السلطانة لهلالية كنت فينا وباقية يا لالة وما زلت وحيدة ف لمحبة والصدق فريدة ف السماحة والرفق ما حافيتي فينا ما غضبت على حد يا الشجرة لعفية رضيتي علينا جميع ولاد وبنات وصاتنا يا خوتي واحد واحد عل الخاوة ولمحنة حينت الخاوة حدها الدنيا ومن بعدها طارت ف لعلالي ومشات كيف ندير يا لميمة حتى ننساك وانت ف بالي نعاس وفياق آ ش جا ما يصبرني على هاذ لفراق غير نهز كفوفي ونترجى مول الرجا والحكمة مول القدرة ولحكام يبرد ما بي ويفاجي هاذ الغمة والضيم اللي طاحوا علي ونزلوا طيحة لعمى ف الظلمة راه قد ما طالت هاذ المحنة لازم ما تزول وتمحى ونشق ف الصخر مسرب وفجوة ونمشي رافع الراس ف مسالك الضيق والزحمة حتى نعيا ونسير وعلى بعاد حبابي كيف ندير
