الطنز العكري : حكومة التقشف

شوف شوف
وعاود شوف
وزيد فالشوف
ما بان لك غير التقشف
طاحت وما لقيناها
طارت شقوف..
وشحال من مشروع
تكول أنت مخلوع
فالملفات ملفوف..
والملفات مسكينة
ناعسة فوق الرفوف..
والشعب مسكين
طير لجراح
ريشوه ترياش
خلاوه منتوف..
ما يتفكروه غير بالزيادات
والضرائب..
هاذ الشي أكتر من اكتر..
أوف.. أوف.. أوف..
مشى الزين..
ومشات الحروف..
الخدمة باح..
الاستثمار باح..
الترقية باح..
غير شدو فالارض
واللاشدو الصفوف..
وهما يمقصو فالمقاصة..
يقصو الشوارب..
وعفاو على المرا
ما عفاو على لحية
مارحمو مكفوف..
اللي ما خدامش..
نقولو.. هذاك ما خدامش
هذاك معروف..
واللي خدام.. تيكمل الشهر
بالكلمات المسهمة..
وهو مزير مكروف..
وقال ليك باقيين
غاديين يزيدوه فالتقشف..
شوف.. شوف..
وعاود شوف..
وزيد فالشوف
يبان لك
الشعب مقصوف..
قصفة من بعد قصفة..
قصمة من بعد قصمة..
والعقل هايم فالهموم
غارق ومخطوف..
هاذو وقيل غاديين
يكملوها ويجملوها..
ويوحلوها..
ويخرجو كلشي للزناقي
يمدو لكفوف..
ويحرمو العيشة..
ويرحمو كلشي..
ويحللو الدفوف..
يحللو صوت لمرا
فالصندوق..
وصوتها فالحكومة
متلوف..
غير بسيمة وما تبتسم..
وحدها يتيمة..
فغابة من اللحي والوبر والصوف..
تكول بحال إلى الحكومة محجبة
ومطرقة، ومعلقة..
ما مزوجة ما مطلقة..
ما عندها مصروف..
شافت حتى اعيات
وزادت فالشوف..
وما بان ليها غير التقشف.