قصيدة زجلية: تعالى تشوف

تعالى تشوف
أجي تشوف
راه نعيجة
ولات خروف
وموكة
ولات تحكم والطير الحر
من اللور
يشوف...
تعالى تشوف
أجي تشوف
هاد الزمان
ولا متلوف
عود السلاح
فالكوري
مكتوف
والحمار
فالمحرك يطوف
والعرا ولا موضة
والصوفة
ولات هتوف
تعالى تشوف
أجي تشوف
تكفاو البيزان
وتكعدو الشقوف
ودارت ليام
وتبدلوا لحروف
الحر ولا نَكِرة
والرعواني ولا معروف
وفهاد لبلاد ألولاد
المزلوط
زلطو غادي ويدزاد
اوزيد الشحمة
فظهر المعلوف
واللي ما عجبو حال
يتهرسو ليه النيوف
شحال من واحد
قرينا فيه الأمان
حيت ملي كان فالبرلمان
كان على قبلنا
محيح مزيان
وملي ولا على خزائن الأرض
خان العهد
ولا عاطينا
غير الصهد
ومصنفنا مع بو حلوف
ياربي
راك عالي وعالم
ومن سماك
تراقب وتشوف
مالنا غيرك وحدك
ليه نهزو لكفوف
شوف من حالنا
خلصنا من هاد الظروف
وانت يا بنادم
انفض عليك تراب الذل
والخوف
وقول كلمتك
وغادي تشوف.