حكومة لاستيك

مدد.. مدد
مطط.. مطط
زيد.. زيد
مدد فعمر حكومة التصريف..
مطط فعمر توقيت الصيف..
زيد على اليزيد..
وفوق بوهيوف زيد الهيف..
زيد.. زيد فالتهريج.
زيد .. زيد فالنعاس..
زيد فالدخان..
زيد فالحليب..
زيد فالكاس..
زيد من بعد الزيادة زيادة..
واخا يخرج الشعب كلو
هاز لاماليف:
»"لا لا ثم لا..
لحكومة العدالة«"
زيد.. زيد فعماك
والأعمى إلى ضرب
ما يفرق ما بين كرش
ولا نيف..
مدد.. مدد..
مطط.. مطط..
الليف ما ينقط..
والزيادة خيط من السما..
صيف.. وخريف..
وها الخبز من بعد البنزين..
تيعيط على واحد وتمانيين..
حذار.. حذار..
فدقيق الخبز يتمرغ ليك النيف:
إلى وحلتيها
وتعجنات رغيف..
زيد .. زيد مطط فالاصلاح..
وأجل.. أخر.. وعطل..
وما يهمك حد..
ورد كل أيام الله حد..
وحتى لالة الحكومة
ردها لا حكومة..
حتى حاجة ما تبقى حشومة..
مدد.. مدد..
وزيد جمد..
ومطط..
ما بين الليف والبا..
يولي ما بين الليف واليا..
إلى تجبد..
مطط.. مطط..
عطل وقتك..
مثل الساعة تك.. تك..
أو مثل عبد الاله والعفريت
أو .. أو .. أو..
تك تك .. تك .. تك.
وإلى لهاك تكاتر الوقت
شذب لحيتك..
أو لهي يديك
وتمرن على عقيد الكرافاط
عقدها وحلها..
عاود عقدها..
وإلى عاود تاني الوقت شاط..
انزل لخيوط الصباط
عقدها وحلها..
وعاود عقدها..
مثل الساعة تك.. تك
تك. تك!