زجل .. نبتة الخير

مللي تخْسر الأوضاع
ونبتة الخير تذبل
مللي يكترو اللْفاع
وبنادم يخاف من لحبل
مللي الضحكة تعطي التِّيساع
والدمعة الحارة تنزل
مللي الكلمة تبقى ف القاع
والطم هو الحل
مللي الخبزة ف يد لتباع
ومصارن المسكين تتركل
مللي تصماك لسماع
وداك على داك مفضل
ساعتها جاية بالتطواع
مشلضة بلا خل
ساعتها ماينفع تقناع
ولا كلام معسل
مللي الحق ف الدلالة يتباع
والباطل بمونتو يتبسل
مللي الضيق يكرف التيساع
والفلس ف نسانا يتغزّل
حسبها جاية بالتّگراع
وشحال من واحد فيها يحصل
مللي السوسة تْصعاب ف التقلاع
والعلة بايتة تنغل
مللي الغلة تحوّزها لطماع
وكلها يشالي بمنجل
قرا السلام على ما ضاع
وما جاي مْبدّل