ياحرّة يابنت الحرايرْ

.
ياحرّة يا بنت المرا الحرّة
==============
ياحرّة يا بنت المرا الحرّة .....يا مصحّية فينا رقود الضّمايرْ
ياسمن مصَفّي في الجرّة.... تركتِ فكري في خصالك حايرْ
غيرك من النّسا تتزيّن من برّة .....من داخل الله يعلم آش صايرْ
إنت ظاهرك يكشف حقيقة مرّة......تنبيني بكفاحك وقت المرايرْ
انت اللّي تكوني في ليلة قِرّة.....مدفّية المكان مثل الجمايرْ
انت ذهب ملفوف داخل صُرّة ......وقت الكبيسة ليك الدّبايرْ
إنت غالية علينا كثير يادرّة .....في المحاين ياما هزمت شرايرْ
ْ محال نرضى تكون ليك ضرّة.... و لا تقدر تزاحمك ضراير
فرق بين اللّحم إذا تعرّى....تنهشه الوحوش والعقاب الطّايرْ
وبين المصان كرّة ورا كرّة.....محفوظ والسّور عالي دايرْ
لاتقدر عليه كلاب ولا هرّة.... ولاتنهشه وحوش البرايرْ
نحيّيك يا مدخّلة على قلوبنا المسرّة..... ياحرّة يابنت الحرايرْ
ونزيد نحيّيك مرّة ورا مرّة ......على جبينك القمر مضوّي نايرْ
*عبدالسّتّار زرّوقي
القيروان
تونس
2011/11/11