عيشة عمر حمداوي

شافوا الزين فيها يقطر عسل
قالوا هادي هي مولاة الدار
من غيرها ما تحلى العيشة
والراجل اللي قرب لها تكل
ما عرفوها مولاة الغار
ديك عيشة قنديشة
تمشي وتجي فالدروبة
أتخلي القلوب مرهوبة
ما ينفع معها جاوي ولا تبخار
ولا حجاب مدفون فباب الدار
ما تحشم ما تخاف
غير إلى شعلت النار
وشحال من راجل مسكين
شافها جاية برجلين كيف الجمل
وحرق عمامتو فالحين
أهرب قدامها قبل ما يحصل
***
قالوا عويشة مولاة المرجة
السودانية الكناوية
حسن عوان اللي كحلت عليه زمانو
ما يسلم ما ينجى
أما يعرف ذاتو فين هي
حتى اللي بدرها بلسانو
كالوا عليها مرة مكابرة
شربات لعدو لحشيشة
حتى سماها كونديشة
من بعد ما هدم سوارها
أفتك بهل دارها
أمرر عليها العيشة
كالوا عليها مرة مقزوزة
سحارة وعكوزة
ما فيها ما يتشاف
تعلي العزري فحياتو
أعمرو ما يتداوى
تفرق الراجل بمراتو
أتزرع العداوة
***
يا ما داروا يا ما جالوا
يا ما كتبوا يا ما كالوا
هاد عويشة شكون هي
واش إنسية ولى جنية
ما يعلم بحالها غير سيدي ربي
خالق الإنس والجان
سبحانو ما خفتو خفية
والصلاة والسلام
على نبينا العدنان
سيدنا محمد زين السمية
عمر حمداوي مكناسة الزيتون