حروف زجلية بمناسبة رحيل الشاعر محسن أ خريف

شهقت عين لبدو
على مول لكتبة
السايرة من هادي زمان
تفتش ف حوال لبلاد
وتقيدو
بشلا كلام ومعاني
من حكاية ورواية وقصيدة
تحيي لمايت اللي عندو
ومللي ضربو الضو
اسيادي الضو
من عين لمكان
ف البوق والخاطر
مازال عامر بالمحبة والشوق
غابو حباب لجواد
وتعطلو صحاب لعتاد
كيف لعادة بلا فايدة
مات مول الكتبة بلا ميعاد
مات يا سيادي وحدو
تكفن بتوب الضو
وما نوى على غفلة يجي عندو
وروحو بقات شاهدة
تحيي اشباب
اللي باقي ف حر جهدو
بقات جوادو شاهدة
على الفوضى النايضة
ف سوق ارى وجيب
بلا ما تضرب لا لة ومالي حسبة
وعند مول الكتبة
الراسمة الضحكة ف وجه الشمس
والفاضحة البكية ف غرق الليل
مول الجدبة
النايضة ليه فظهر لحروف
لحدبة
تسد عليه شرجم دفا
وكمل عليه بجفا لعتبة
ف وجه لعباد
اسيادي يموت وحدو
ومات اسيادي وحدو
كيف لخرافة ما يصدقها عقل
ولا قلب تالف ف وراق الشوافة
وعلى روحو جواد لكتبة
هزو لورقة ولقلام
ومن كية الشمتة الخاطفة
على المرحوم محسن اخريف
يكتبوا ويعاودوا