باطو الگاز الروسي اللي جابو لملايري بنبراهيم ما دخلش المحمدية بسباب الابناك

علمت "كود" ان الباطو اللي فيه الغاز الروسي اللي جابتو شركة "BGI PETROLEUM اللي هي فرع من امبراطورية رضا بنبراهيم ما دخلش البارح لميناء المحمدية.
هاد الباطو اللي فيه درابو بنما كان خرج من ميناء "بريمورسك" الروسي نهار 20 مارس كيف نقلات جريدة "لوديسك" وكان من المفروض ينزل حمولتو من الغاز الروسي ليلة الخميس 6 ابريل الجمعة 7 ابريل٬ فخزانات كانت كراتهم هاد الشركة من "لاسامير".
الغاز كان غادي توزعو محطات تابعة لشركة بنبراهيم للبترول واسمها "يوم".
وحسب مصادر "كود" فالباطو بقى خارج الميناء والجديد اللي وقع هو ان الابناك تخلات على تمويل هاد العملية. كانو موافقين شوية وهما يبدلو رأيهم. اش وقع شكون قالها ليهم. لحد الان ما معروفاش. اللي معروف دابا هو ضربة هي لهاد لملايري بنبراهيم اللي خدام بدورو غير واجهة لشخصية كبيرة بزاف فالبلاد.
الابناك المغربية او الدولية اللي كتمول هاد شراء الغاز الروسي وكتعامل نفس الوقت مع الغرب كتعرض لعقوبات. حقاش ميريكان ودول اوروبية دايرة عقوبات على موسكو على خلفية الحرب في اوكرانيا.
وكان الناطق الرسمي باسم الحكومة قال فتصريح سابق باللي واردات الغاز والتبرول الروسي بلغت 9% طوال سنة 2022، وصلت خلال الشهرين الأولين فقط من هذا العام 2023 حوالي 13%