عاجل. القضاء دار عقلو انتاصر العدل.. ولد الملايري هيلا تطلق

علمت "كود" ان ولد لملايري هيلا تحكم باش يخرج اليوم 25 غشت 2022. يتوقع يخرج من حبس الصومال فتطوان هاد العشية.
هاد القضية بدات بعد ما وقعات كسيدة السبت 14 غشت 2022 وسط المضيق. دخلات "لومورگيني" ب600 مليون فطاكسي مع الثلاثة الصباح وهرب اللي كان سايگ مع شي مرا. فالغد جا شي حد قدم راسو شيفور لكن البوليس فرشو وطلع غير صاحب اللي كان فالطونوبيل اللي رسلو.
من بعد غادي ياخذ التحقيق تطورات تشدو فيها ثلاثة وتابعو فحالة اعتقال منهم ولد لملايري واخا ما كانش سايگ وعندو اخلاء ذمة باش عطى الطونوبيلة ديالو لصاحبو.
من بعد بدات الهدرة على الطونوبيلة وعلى الماتريكيل دوبلڤي ولكن صاحبنا كان شراها مديوانيا.
المهم القضاء صحح اخطاء دارت قبل منها اعتقالو هادي ايام. كان توقف فميناء طنجة المدينة وهو باغي يسافر لاسبانيا ومن تما وهو مشدود حتى اليوم.