ها اختيارات السكتيوي ضد الرجاء فأول امتحان له مع حسنية أكادير اللي كيدربها فابور

معول عبد الهادي السكتيوي المدرب الجديد لحسنية أكادير أنه يبدا التجربة الجديدة ديالو مع الفريق السوسي بالرباح، ولو أن الماتش الأول له مع الحسنية ما غايكونش ساهل حيث ضد الرجاء الرياضي الفريق اللي راجع ناشط من انتصاراتو فعصبة أبطال إفريقيا.
عبد الهادي السكتيوي اللي كيدرب حسنية أكادير فابور دابا، من بعدما تعهد لمسؤولي النادي برئاسة أمين الضور ملي بغاو يسنيو معه أنه ما ياخد حتى ريال كمدرب من عند الفريق فما تبقى من هذا الموسم كمبادرة منو تجاه النادي اللي خدام معاه منذ حوالي 30 عام، وللعشرة ديالو مع السوسيين، قرر يدخل ماتش الرجاء الرياضي عن الجولة 20 من البطولة الاحترافية، وهو أول امتحان له مع السوسيين بلائحة فيها 22 لاعب.
وكتكون لاليست اللي اختار عبد الهادي السكتيوي فماتش حسنية أكادير ضد الرجاء الرياضي من المجهد، الجرباوي، طاشطاش، قلعي، شماخ، بوخنفر، القايدي، مبلي، زمراني، كتلوندي، حناوي، آمي، شيخي، لخضر، ميهري، سويسي، بنشوق، إعلوين، بخاش، مرزاق، أفصال، القعدة.
وكيطمح عبد الهادي السكتيوي لتحقيق الانتصار على الرجاء الرياضي اليوم الأحد فتيران أدرار بأكادير، باش تكون معه انطلاقة حسنية أكادير الفريق اللي واجه مشاكل كثيرة هذا الموسم من بينها عدم الاستقرار الإداري برحيل الرئيس الحبيب سيدينو، وبعدها الانفصال عن المدرب البرازيلي ماركوس باكيتا اللي تم تعويضو بعبد الهادي السكتيوي.