قصة النفتي والوداد فطريقها للطلاق من بعد نهاية ماتش الحمرا وبيترو أتليتيكو

حكم المهدي النفتي مدرب الوداد الرياضي على راسو بالرحيل من الفريق الأحمر، من بعد المستوى اللي ظهر به مع الواك والنتائج المتواضعة، وأخر هادشي النيفو الكارثي ديال بطل إفريقيا البارح الجمعة ضد بيترو أتلتيكو الأنكولي فعصبة أبطال إفريقيا، واخا حقق الرباح بواحد لزيرو ولكن الفريق ما قنعش.
الإقالة ديال المهدي النفتي كانت محطوطة فوق البيرو ديال سعيد الناصيري قبل 3 الماتشات، وتقريبا من بعد الإقصاء ديال الفريق من الموندياليتو، ورئيس الوداد كان كيحاول يحافظ على استقرار الحمرا ما أمكن بحكم ضغط المباريات والتراكم ديالها.
مصدر مطلع كشف أن قصة المدرب النفتي مع الوداد الرياضي سالات اليوم مع نهاية ماتش بيترو أتلتيكو من بعد الأداء الكارثي اللي قدم الواك، وأن إدارة النادي اتخذت قرارها بإقالة المدرب التونسي، فانتظار الساعات القليلة المقبلة للإعلان عن الطلاق بين الطرفين.