محاكمة لمجرد. شبح اتهامو بالاعتداء جنسيا على ميريكانية تابعو فباريس. القاضية والنيابة العامة سولوه وها ردو

قضية اغتصاب سعد لمجرد قبل سنوات لشابة امريكية فامريكا باش هربوه للمغرب باش ما يتحاكمش٬ خرجات ليه فباريس. للمرة الثالثة ف4 ايام تجبدات ليه فقضيتو اللي تهماتو "لورا"٬ 26 عام باغتصابها فالغرفة 714 باوطيل ماريوت بباريس ليلة 26 اكتوبر 2016.
قضية الشاب الامريكية تعود الى 2010. كان لمجرد فامريكا. اتهماتو فتاة من بروكلين فنيويورك بالاعتداء الجنسي عليها والضرب. هرب من ميريكان قبل اعتقالو. ف2016 توصل لتسوية فالشق المدني معها. شحال عطاها باش تنازلات على مواصلة الشق الجنائي؟ ما عمرو بغى يهدر عليها وحتى محامي الاميريكية ما بغاش يجبد شحال خدات.
دابا هادي 4 ايام باش بدات محاكمة لمجرد فباريس تجبدات هاد القضية 3 مرات. فكل مرة لمجرد كيرد "باغي نركز على هاد القضية". اليوم 22 فبراير 2023 تجبدات ديك القضية. القاضية سولاتو عليها.
النيابة العامة حتى هي جبداتها وسولاتو شحال خلص فهاديك القضية. لمجرد مقريينو محاميه رد: ما باغيش نهدر على هاد الشي.