سعد لمجرد داير فيها مامسوقش.. قضية الاغتصاب رجعات للواجهة وواخا هكاك غادي يخرج الجديد

في عز الرجوع ديالو للحفلات والسهرات خارج المغرب، فرحة سعد لمجرد الوهمية ماكملاتش بعدما عاودات محكمة الاستئناف فباريس فتح الملف ديالو وقررات تحيلو على غرفة الجنايات وقالت أن القضايا لي متابع فيهم هادي 3 سنين هي جرائم اغتصاب وماشي مجرد اعتداء جنسي.
لمجرد بهاد الخبر تصدر عناوين الصحافة العربية والعالمية حيت شوهتو فايتة حدود المغرب. وهو كيف ديما مكيدويش في هاد المواضيع، وكيدير راسو مافخبارو والو وبحالا ماشي هو المعني بالأمر، وحط البارح تصويرة كيقول فيها أنه كيوجد عمل جديد.
وقررات المحكمة في فرانسا البارح الثلاثاء تعاود محاكمتو بتهمة اغتصاب الفرنسية لورا بريول بفندق ماريوت بباريس في 2016.
وحاليا لمجرد متابع في حالة سراح بعدما خلص كفالة صحيحة، وعندو قضية اعتداء جنسي اخرى فسان تروبي فجنوب فرنسا والبنت لي اتهماتو رفضات تفصح على هويتها، والقضاء الفرنسي غادي يقرر واش يرجع يدخل للحبس ولا تكون المتابعة وهو خارج أسوار السجن، ويبقى كيدير الحفلات والسهرات بحالا ماواقع والو.