رمضان غايشعل بالنقاش على القانون الجنائي. .وزير العدل كيوجد سلسلة ندوات على الدين والحريات والجنس خارج الزواج باش يفرش ارضية اصلاح هاد القانون لي حطو المستعمر

علمت "كود" من مصدر مطلع، أن عبد اللطيف وهبي، وزير العدل، كيستعد لتنظيم لقاءات وندوات حول المواضيع الخلافية فمشروع القانون الجنائي، خصوصا لي فيها نقاش مجتمعي واللي تجاوزها الواقع من قبيل الحريات الفردية والافطار فرمضان والجنس خارج اطار الزواج.
وحسب مصدر "كود"، فإن وزير العدل غايدير هاد النقاش باش يوجد أرضية اصلاح القانون الجنائي لي وصل لمراحلو الأخيرة. هادشي غايكون فرمضان، خدمة كبيرة كتسنا اطر وزارة العدل حسب مسؤول ل"كود".
وأكد مصدر مقرب من وهبي ل"كود" بلي هاد المشروع غادي ينتاصر لمغربية الحريات والحداثة والمعاصرة، مشدد بلي في نفس الوقت غادي يحمي كرامة المواطن فمواقع التواصل الاجتماعي بتجريم التشهير وتشديد العقوبات على نشر الفايك ونيوز وتشويه سمعة الأفراد والابتزاز الجنسي وغيرها.
وبعدما دار وزير العدل تحركات فهاد النطاق، خرج زعيم حزب العدالة والتنمية ببيان كيقول فيه بلي وهبي باغي يدير الفتنة فالبلاد، وعاودو نفس الكاسيطا ديال القيم والمرجعية الاسلامية، رغم ان هاد القانون خصو يتغير شحال هادي، اذ لا يعقل انه فاش جابو المستعمر عمر تبدل وفيه نصوص متخلفة.