"+ CANAL" : الوداد بوحدها اللي غاتشارك فالسوبر ليگ الإفريقي من المغرب والرجاء ماكيناش

كشفت قناة " + canal" الفرنسية على لائحة الفرق اللي غادي تشارك فالنسخة الاولى من بطولة السوبر ليك الإفريقية وكتعرف هاد لاليست تواجد فريق واحد من المغرب.
وحسب القناة الفرنسية فعدد الفرق اللي غتكون مشاركة فالنسخة الاولى من بكولة السوبر ليك غيكون 8 ديال الفرق، ومن بينهم الوداد الرياضي، فالوقت اللي كيغيب فيه الرجاء الرياضي على هاد اللائحة.
والغريب فالأمر أن هاد لاليست اللي كشفت عليها القناة الفرنسية، كتضم فرق أقل قيمة من الرجاء الرياضي فمجموعة من الأشياء سوا من ناحية الشعبية والجماهير أو البنية التحتية ولا حتى القيمة المالية ديالها، فحال حوريا كوناكري الغيني، وسيمبا التانزاني، وفريق بيترو أتلتيكو الانغولي.
أما باقي الفرق اللي كاينة فهي عندها قيمتها على الساحة الإفريقية فحال الوداد والترجي التونسي، تيبي مازيمبي من الكونغو الديمقراطية، ماميلودي صن داونز الجنوب إفريقي والأهلي المصري.