شكون كايسير حسنية أكادير؟.. الفرقة كاتعيش التخبط والهزائم والكاتب العام للفريق البطاح كينفي استقالة المدرب واخا كاين فيديو فيه إعلان للاستقالة

البارح مورا الماتش ديال حسنية أكادير مع الماص لي سالا بالتعادل 1-1 وفالندوة الصحفية علن المدرب البرازيلي باكيتا على أن هذا هو آخر ماتش ليه مع الحسنية.
المدرب عارف أن الفرقة ماجاتش مع البروجي ديالو، حينت هو كيلعب على الألقاب والحسنية بغات "تكوين فريق"، وهادشي ديما كايصرحو به المسؤوليين ديال الفرقة، يعني الحسنية مكتلعبش على الألقاب.
الغريب في الأمر أن رشيد البطاح لي هو الكاتب العام ديال الحسنية خرج بواحد البيان وسايفطو للمنخرطين، وقال ليهم أن المدرب مستمر مع الحسنية وغدا غايرجع للتدريب ديال الفرقة، وقال أن متربصين بالفرقة لي كايروجو للخبر وقيلا ماشافش الإعلان ديال المدرب على الاستقالة ديالو.
هادشي كامل كيأكد أن الفرقة كاتعيش التخبط والفوضى فالتسيير بسبب شي مسؤولين فالإدارة لي كايطالب الجمهور بالاستقالة ديالهم.