جمهور الرجاء عطى درس لحفيد مانديلا وميساج "الخضرا الوطنية" مبلبلها فجنوب إفريقيا

خلق جمهور الرجاء الرياضية بلبلة فجنوب افريقيا من بعدما كلاشا حفيد نيلسون مانديلا، اللي جابتو الجزائر الاسبوع الماضي باش يكذب على المغرب فافتتاح كأس إفريقيا للمحليين وتمرير مغالطات سياسية ضد المملكة، وهادشي تصداو له الرجاويين وندمو "مانديلا الصغير".
الميساج القاصح اللي رفعو الرحاويين البارح فماتش الرجاء مولودية وجدة، واللي جاء فيها: "مانديلا الصغير راه المستعمرة اللي مازال متبقية فجنوب افريقيا هي أورانيا" دار حالة فجنوب افريقيا هاد الصباح وكل شي كيديوي عليه فمواقع التواصل الاجتماعي"، ومتصدر ترند فتويتر بجنوب إفريقيا وكلشي كيسول على كيفاش طاحت هاد الفكرة الخطيرة على جمهور الرجاء، اللي عندو شعبية فالقارة الإفريقية لدرجة ان المشجع الرجاوي ملقب عند جماهير دول إفريقيا جنوب الصحراء بلقب "رجاوي كريستوفر كولومبوس" حيث الرجاويين معروفين بديبلاصمون مع الخضرا فلافريك وكيتبعوها لجميع البلدان.
الجنوب إفريقيين، كاملين كيتكلمو على كلاش جمهور "الخضرا الوطنية" اللي عطاه لحفيد مانديلا، وكيفاش هاد الأخير رجع اسم عائلتو صغيور وضرب نضال جدو فالزيرو، من بعدما قرر يرجع بيدق ديال شنقريحة تبون بتهجومو على المغرب والمغاربة اللي ما سكتوش له دفاعا عن الوحدة الترابية للمملكة، وعطاوه علاش يدور حيث نسا أن منطقة أورانيا فجنوب افريقيا مازال مستعمرة ديال البيض الأقلية اللي عايشة تماك، وهي الأولى بمانديلا الصغير أنه يمشي يحررها فبلاصت ما يكذب على المغاربة اللي الدولة ديالهم فعمرها كثر من 12 قرن.