المغرب الفاسي ربح المحمدية والمصاويين ضربو هدف تاريخي على الجامعي

حقق فريق المغرب الفاسي فوز مهم على شباب المحمدية اليوم الأحد فتيران فاس الكبير، ضمن الجولة 12 من منافسات البطولة الاحترافية لكرة القدم.
الماتش فاز به المغرب الفاسي بنتيجة واحد لزيرو من تسجيل كريم الهاشيمي فالدقيقة 33، وكمل المواجهة بنقص عددي من الدقيقة 83 من بعدما تطرد هيثم عينة وهادشي ما استغلوش شباب المحمدية باش يجيب التعادل.
الرباح ديال المغرب الفاسي كان مهم للفريق ولكن أهم ما وقع فالماتش ما شي هو فوز الماص، ولكن احتجاج المصاويين على إسماعيل الجامعي رئيس الفريق بسبب طريقة تسييرو للنادي اللي ما عاجباهومش داكشي علاش دخلو هزو ميساج قالو ليه فيه: "التسيير الانفرادي يؤدي إلى تدمير النادي"، ومن بعدها خرجو من التيران وخلاو الماتش بادي ومشاو بحالهم.
للإشارة فبهاد الرباح طلع المغرب الفاسي إلى المركز الخامس برصيد 20 نقطة، أما شباب المحمدية كيحتل المركز 10 وعندو 14 نقطة.