كيواصل عزيز البدراوي رئيس الرجاء الرياضي الخرجات ديالو الإعلامية المثيرة للجدل، وخصوصا فطريقة الكلام ديالو على أزمة النادي، وهاد المرة تهكم على جماهير الفريق، وبغا يتملص من المسؤولية ومن الوعود والكلمة اللي عطى بأنه غادي يخسر فلوسو على الرجاء، ودابا حمل جماهير الخضرا المسؤولية فحل أزمة النادي المالية وقالهم حطو لفلوس فالصينية اللي خرجت نطلب بها ولا سيرو تكمشو. وخلال المرور ديالو فبرنامج "بدون لغة خشب" وملي بدا كيتكلم على الصينية اللي خرج تحت شعار "الرجا معانا" باش يجمع فلوس يفك بهم الأزمة المالية ديال الرجاء، حيث عجز هو على حلها وتوفير 580 مليون يخلص باش يرفع المنع على الانتدابات، قال لجمهور الرجاء بصريح العبارة جبد فلوس ولا سير التكمش. وها شنو قال رئيس الرجاء عزيز البدراوي لعشاق الرجاء: "الامتحان الصعيب هو اللي حطينا فيه دابا الجمهور.. اللي راهم دابا فاص أفاص مع واحد سوليسبون وهي ساهمتي غنفكو ما سهمتيش سير تكمش وخلينا نجيريو بالفرقة ديالنا". وكيجي هاد التصريح من بعدما بدا جمهور الرجاء الرياضي كيفقد الثقة فعزيز البدراوي، اللي حتى لدابا باقي ما دار والو من الوعود اللي عطى قبل ما يشد منصب أكبر فريق فالمغرب، من بعدما قدم نفسو فالحملة ديالو على أنه الميلياردير مول الشكارة منقذ الفريق من الازمة وثاقو فيه لكن الرجاء زادت فرقت معه فالمشاكل والنزاعات، وهو خرج يطلب بالصينية باش يجمع فلوس وعجز على توفير 580 مليون باش يفك مشكل النزاعات ويدير الانتدابات اللي محتاجها الفرقة بزاف.
