هاد الشي لي كال وبكل احترافية.. النصيري شكر صحابو فإشبيلة ونسب لهم الفضل فالهاتريك اللي ماركا وقالهم يوجدو لماتش الجاي

كيواصل الدولي المغربي يوسف النصيري نجم إشبيلية الإسباني إظهار التواضع والاحترافية ديالو، ونسب التألقو بتسجيل هاتريك اليوم الأربعاء فدور 32 من كأس ملك إسبانيا على ليناريس ديبورتيفو للعمال الجماعي للزملاء ديالو فالفريق الإسباني.
وعبر الأسد المغربي يوسف النصيري على الشكر لصحابو بفريق إشبيلية، من بعدما سالا الماتش بتأهل الفريق الأندلسي إلى دور 16 من كأس الملك، بعد الفوز العريض على فريق ليناريس ديبورتيفو بنتيجة 5 الأهداف لزيرو ماركا منها النصيري 3 أهداف.
وقال النصيري فتصريح له لموقع إشبيلية: "فرحان بزاف بعمل الفريق، وبالطريقة اللي لعبنا بها وكيف دافعنا، وكنشكر الفريق، والجمهور ديالنا اللي كانوا كيدعمونا فالماتش كامل، وكل شيء كيجي مع العمل، وبالنسبة ليا أهم حاجة هو العمل الجماعي مع الفريق ومن بعدها كتجي الأهداف".
يوسف النصيري وفالتصريح ديالو بين مرة أخرى الاحترافية ديالو، وطوى صفحة ماتش كأس الملك واخا ضرب فيه هاتريك، وأكد بلي دابا خاصو هو وصحابو فإشبيلة يفكرو فماتش البطولة الإسبانية ضد خيطافي وقال: "ماتش الأحد راه ماتش مهم بزاف بالنسبة لنا وغادي نبداو خدامين باش نوجدو له ابتداء من غدا للفوز بالنقاط الثلاث".