كيواصلو المسؤولين الجزائريين الهفوات ديالهم فمواقفهم تجاه المغرب ولو أن الأخير ما كيشوفهمش كخصم ولكن كينظر للجزائر كدولة جارة، والجار غادي تجنب تعايب معه، وهادشي اللي دارت المملكة المغربية من خلال الجامعة الملكية المغربية لكرة القدم اللي بغات تشارك فكأس إفريقيا للمحليين فالجزائر بالمنتخب الوطني لأقل من 23 سنة ولكن كتشوف قدامها الأجواء الجزائرية مسدودة قدام الرحلات الجوية وما يمكنش تبقى تهلك المنتخبات الوطنية بالرحلات غير المباشر المتعبة، خصوصا وأن الجزائر لاصقة فالمغرب. الجامعة الملكية المغربية لكرة القدم برئاسة فوزي لقجع، وتحاشيا للدخول فتوتر مع الجزائر أو المسؤولين على الكرة فيها، قررت تراسل الاتحاد الإفريقي للعبة مباشرة من أجل احترام دفتر التحملات فتنظيم بطولات كرة القدم فالقارة السمراء، وبالتالي فتح الأجواء الجزائرية أمام رحلة جوية خاصة تقل المنتخب الوطني المغربي بطائرة مغربية من الرباط إلى مدينة قسنطينةالجزائرية، اللي غادي يلعب فيها الدور الأول من كأس إفريقيا للمحليين. وهكذا احترمت الجامعة الملكية المغربية لكرة القدم التراتبية فاحترام المؤسسات وقصدت الكاف حيث هو المسؤول الأول والأخير على البطولة وهو المخول له يرفض طلب الجامعة المغربية أو يوافق عليه، ويبلغ اللجنة المنظمة للبطولة الإفريقية بالجزائر وهي تبلغ السلطات الجزائرية بأن احترام دفتر التحملات كينص على ضرورة السماح بتنقل المنتخب المغربي إلى الجزائر فحالو فحال جميع المنتخبات بالاختيار ديالو يعني يجي مباشرة ولا بليسكال أو يجي فالبر أو البحر ولكن الجزائر اللي منظمة البطولة هي اللي خاصها تحترم هادشي. وفالوقت اللي خاص الاتحاد الإفريقي لكرة القدم هو ليخرج فحالة تطلب الأمر يفسر واش الجامعة الملكية المغربية لكرة القدم عندها الحق بتنقل المنتخب المغربي فرحلة جوية مباشرة من المغرب إلى الحزائر أو لا، خرج واحد المسؤول جزائري الاسم ديالو رشيد أوكالي وهو رئيس اللجنة المنظمة لكأس إفريقيا للمحليين بالجزائر وبدا كيضرب ويزكل فالكلام، فالوقت اللي كان خاصو يكون محترف ويتعامل بشكل مؤسساتي وتكلم مباشرة مع الكاف ماشي يبدا ينظر قدام وسائل الإعلام وكل واحد يفسر كلامو على قد فهمو وهادشي إلى كلامو كان أصلا مفهوم حيث كيبان غير كيدخل ويخرج فالهضرة. المسؤول الجزائري سقط فالفخ ديال إعلام بلادو، حيث واخا هو رئيس اللجنة المنظمة لكأس إفريقيا للمحليين بالجزائر، اتضح أنه ما عندوش الخبرة اللازمة للتعامل مع مثل هاد المواقف، وفالوقت اللي كان خاصو يراوغ الأسئلة اللي توجهت له بخصوص شرط الجامعة الملكية المغربية لكرة القدم ويخلي الكرة ملعوبة بينها وبين الكاف دخل الجزائر طرف، واللي فالأصل المسؤولين على الكرة بالمغرب ما كيشوفهاش طرف، حيث هي مستضيفة البطولة أما المسؤول على القوانين والأنظمة هو الاتحاد الإفريقي وهو لمن وجهو المراسلة ديالهم. وقال رشيد أوكالي رئيس اللجنة المنظمة لكأس إفريقيا للمحليين بالجزائر فتصريح ضبابي: "الجزائر معنية بالتنظيم على المستوى الوطني ومجبرة باش تأمن للمنتخبات المشاركة فالبطولة النقل على الأراضي ديالها، أما بالنسبة لتنقل المنتخبات من دولها إلى الجزائر للمشاركة فالبطولة فهو من اختصاص ومن مسؤوليات الاتحادات ديال هاد المنتخبات سوا من الشق المادي أو الطريق اللي غادي يجيو بها.. دفتر تحملات تنظيم البطولة كيقول أن البلد المستضيف خاصو يوفر التسهيلات ماشي كيحدد واش الرحلة مباشرة أو غير مباشرة، وبزاف من المنتخبات اللي غادي يجيو يلعبو فالجزائر غادي يديرو ليسكال". وكانت الجامعة الملكية المغربية لكرة القدم، راسلت الاتحاد الإفريقي لكرة القدم بخصوص احترام بنود دفتر التحملات لاستضافة البطولات الافريقية، خاصة فيما يخص تسهيل ظروف المنتخبات المشاركة فكأس إفريقيا للمحليين بالجزائر، ومن بينها المنتخب الوطني المغربي لأقل من 23 عام، وطالبت بسفر المنتخب الوطني الى مدينة قسنطينة اللي غتستضف مباريات النخبة المغربية في هذه البطولة عبر رحلة مباشرة انطلاقا من مدينة الرباط وبواسطة طائرة خاصة للخطوط الملكية المغربية الناقل الرسمي للمنتخبات الوطنية، وفي حال رفض ذلك فقد قرر المكتب المديري بالإجماع عدم المشاركة في هذه البطولة.
