الكبير مدرب الرجاء: ما كانستاهلوش نربحو الماص والخضرا خاصها انتدابات راه الهجوم ما عندناش

أكد التونسي منذر لكبير مدرب الرجاء الرياضي أن الفريق ما كانش كيستحق الرباح فالماتش اللي تعادل فيه أمام المغرب الفاسي سلبا زيرو لزيرو، مساء اليوم الثلاثاء فستاد دونور، ضمن الجولة 9 من منافسات البطولة الاحترافية لكرة القدم وعلن بشكل واضح أن الخضرا خاصينها لاعبين جداد فالميركاتو المقبل.
وفتصريح له من بعد التعادل ما بين الرجاء والمغرب الفاسي قال مدرب الخضرا منذر الكبير: "كنا كنتمناو نبداو مرحلة استئناف البطولة بالرباح فالتيران ديالنا، وكنا معولين باش نفرحو الجمهور اللي جا حضر للماتش فالملعب ونربحو 3 النقاط وللأسف ما قدرناش".
وانتقد المدرب الرجاوي المهاجمين ديال فريقو وقال: "المردود ديال هجوم الرجاء كان متوسط فالماتش وما كانش قادر يخلق فرص ولا يدير فارق فالنتيجة، والمغرب الفاسي عرف كيفاش يوقف الهجمات ديالنا بالبلوك اللي دار وكان خطير فالكونتر اتاك".
مدرب الرجاء الرياضي منذ الكبير ختم التصريح ديالو وهو كيأكد أن الفريق محتاج ضروري لتدعيم الصفوف فالميركاتو المقبل بانتدابات، وخصوصا على مستوى الهجوم ديال الفريق