الإصابة وديشان ما منعوش بنزيما من تشجيع فرنسا وها شنو قال لصحابو قبل ماتش المغرب

حفز الدولي الفرنسي أحسن لعاب فالعالم الزملاء ديالو فصفوف المنتخب الفرنسي باش يربحو المنتخب الوطني المغربي فنصف نهائي كأس العالم قطر 2022، ويتأهلو للفينال ويحافظو على اللقب اللي ربحو فمونديال 2018.
كريم بنزيما الفائز بالكرة الذهبية، ونجم ريال مدريد واللي الأصول ديالو جزائرية، نشر صورة ديال صحابو فالمنتخب الفرنسي فمواقع التواصل الاجتماعي وعلق عليها: "يالاه أصحابي مازال غير 2 ماتشات.. حنا وراكم يالاه"، فإشارة منو أنه واخا ماكينش معهم فالمونديال ولكن راه مشجعهم باش يحافظو على اللقب اللي ربحو عام 2018.
للإشارة فكريم بنزيما اللي رجع كيتدرب مع فرقتو ريال مدريد من بعدما برا من الإصابة اللي جاتو فمعسكر فرنسا قبل كوب ديموند، وحسب بزاف ديال المتتبعين للكرة الفرنسية فأحسن لعاب فالعالم فعام 2022، تظلم بزاف مع المنتخب الفرنسي، وخصوصا فالفترة ديال المدرب الفرنسي ديديي ديشان، اللي حرمو من المشاركة فالتتويج بكأس العالم 2018 تحت مبرر الاختيارات، ومن بعدها حرماتو الإصابة أيام فقط من بداية كأس العالم قطر 2022، من المشاركة مع الفرنسيين فهاد النسخة وقرر ما يمشيش معهم ويخلي بلاصتو لعاب آخر وفضل مصلحة المنتخب الفرنسي على مصلاحتو الشخصية.
ولكن المدرب ديديي ديشان ترك بلاصتو خاوية وما عوضو بحتى لعاب آخر ومشى غير ب 25 عنصر للمونديال، وملي بدات الحالة ديال كريم بنزيما كتحسن تجاهلو وما بغاش يعيط له ولو غير يكون حاضر مع صحابو فالبطولة وتكون المشاركة ديالو غير رمزية فحالة توج المنتخب الفرنسي باللقب، الشي اللي جعل بنزيما ينشر فوقت سابق صورة لرونالدو البرازيلي عام 2002، واللي مشى مع البرازيل موعت للمونديال قبل ما تبدا حالتو تحسن وساهم فتتويجها باللقب وكان حاسم وربحها فالفينال ضد ألمانيا وسجل 2 أهداف.