الرجاء هاجت على السوالم وقربت من مقدمة البطولة

قرب الرجاء الرياضي من مقدمة الترتيب من بعدما ربح اليوم السبت فتيران البشير فالمحمدية، فريق شباب السوالم ضمن الجولة 8 من البطولة الإحترافية لكرة القدم.
الرجاء اللي كان هو الضيف عند السوالم فتيران البشير فالمحمدية، قدر يحول التأخر ديالو فالماتش بهدف واحد لرباح بنتيجة 4 الأهداف لواحد.
السوالم ماركاو الأولين فالماتش من بعدما استغل المهاجم ديالو جبريل سيلا خطأ لحارس مرمى الرجاء مرباح غايا وسجل الهدف فالدقيقة 16، أمام الخضرا فغادي تجيب التعادل فالدقيقة 25 من ضربة جزاء تحصل عليها محمد بنتايك وماركاها محمد الناهيري، ومن بعد منها غادي يسجل محمد زريدة بيت التقدم للرجاء والثاني فالماتش ديال الخضرا بضربة رأسية خدعات حارس مرمى السوالم هشام العلوش وهاذي فالدقيقة 39، وسالات الجولة الأولى بتقدم الرجاء.
وفالجولة الثانية حاول السوالم يخرج يقلب على بيت التعادل الأمر اللي ستغلوه اللعابا ديال الرجاء، وادي ينجح زكرياء حدراف فتأمين النتيجة للنسور فالدقيقة 59، بهدف ثالث قبل ما يختم سفيان وبنجديدة مسلسل لبيوتا للخضرا بهدف رابع فآخر اللحظات، وهاكذا بقات النتيجة حتى سالا الماتش.
وبهاذ الرباح تمكن الرجاء الرياضي من القفز إلى المركز الرابع مؤقتا ووصل على السوالم وكل فريق منهم عندو 12 نقطة، فانتظار نتائج الماتشات ديال الجولة 8.