ريال مدريد ربح الكلاسيكو وطير الصدارة من البارص

ربح ريال مدريد كلاسيكو الصبليون ضد البارصا اليوم الأحد، فتيران سانتياكو بيرنابييو فالعاصمة ديال الصبليون مدريد، فالجولة 9 من بطولة الصبليون.
ريال مدريد حقق الرباح بنتيجة 3 لبيوت مقابل واحد، وماركا له كريم بنزيما الهدف الأول فالدقيقة 12، وعزز له فالفيردي الحصة ببيت ثاني فالدقيقة 35، وسالا الشوط الأول بنتيجة 2 لزيرو للريال.
وفالجولة الثانية دخل البارصا وبدا كيقلب على طريقة تخليه يرجع فالماتش وتسنا الدقيقة 83، باش يوصل للشبكة ديال ريال مدريد من خلال البديل فيران توريس اللي ماركا له البيت الوحيد فالماتش وفالوقت اللي البارصا طمع وبدا يقلب على التعادل، الريال بدا كيدير ليكونتر اتاك، وقدر يجيب ضربة جزاء بواسطة رودريكو وهو اللي ماركاها وقتل بها الماتش ببيت ثالث فالدقيقة 91.
وبهذا الرباح انتزع ريال مدريد الصدارة من البارصا بفارق 3 بوان، بحيث صبح فريق عاصمة الصبليون هو الأول بوحدو برصيد 25 نقطة فلاليكا، أما البارصا فرجع هو الثاني برصيد 22 نقطة.