الثمن قليل بشرط تتفرج فالإشهارات.. "نيتفليكس" كتفكر تلونصي أبونمون جديد

شركة "نتفليكس" كتفكر باش تلونصي خدمة جديدة فنهار 1 نونبر اللي جاي، كتسمح للناس باش يكون عندهم كونط بلاتفورم بثمن قليل بشرط أنهم يتفرجو فالإشهارات وسط الأفلام والبرامج.
هاد الخيار الجديد فكرات فيه الشركة بعدما ضرباتها خسائر كبيرة فالربع اللول من عام 2022، وفقدات أكثر من مليون مشترك بسبب قيمة الاشتراك اللي طلعاتها فأول العام، وسيستيم ديال كونط واحد لكل فرد.
"نتفليكس" كتسابق باش تحط الفيرسيون الجديدة فأقرب وقت، قبل ما تطلق منصة "ديزني" النسخة الجديدة ديالها المدعومة بالإشهارات حتى هي.
ومن المرجح باش يكون الثمن الجديد ديال الاشتراك فالبلاتفورم الجديدة بين 7 و9 دولار فكَاع دول العالم، فالوقت اللي واصلة فيه دابا حتى ب15 دولار.