عاجل. وحنا اش نديرو بيه وعلاش نسمعو ليه يرجع. مجلس الدولة الفرنسي عطا الضو الاخضر باش يجريو على الامام المغربي المتطرف

عطا مجلس الدولة الفرنسي قبل قليل الضوء الاخضر باش يجيرو علي الامام المتطرف المغربي حسب ايكويسن. القرار كانت خداتو وزارة الداخلية لكن المحكمة الفرنسية وقفات هاد القرار ومن بعد ولى بيد مجلس الدولة.
وهنأ وزير الداخلية جيرار دامانان الجميع بما سماه "الانتصار الكبير للجمهورية" واضاف باللي غادي يجريو عليه من التراب الفرنسي.
مجلس الدولة رفض التبريرات اللي بسبابها اعتارضات المحكمة الادارية على طردو من لبلاد. هاد المحكمة بررات قرارها باللي فيها "مس خطير وغير قانوني" على حياتو.
مجلس الدولة قال باللي ما كاينش مس خطير او غير قانوني لحياة حسن ايكويسن وباللي ولادو كبرو وما بقاوش محتاجين ليه وباللي مراتو عندها الجنسية المغربية وتقدر تعيش معاه.
دابا المغرب اش غادي يدير بيه. بلادنا كانت قبلات تعطي لهاد الامام ليسي كونسولير باش يقدر يدخل فيه للمغرب.
هاد الامام كانت عندو الجنسية الفرنسية بعد ما دوز فيها كثر من 30 عام ولكن سحبوها منو بسباب خطابو اللي ضد المرا وضد اليهود وكيدعم التطرف