المغاربة احتلو بطولة فرنسا.. مغربي أخر سنا فسانت إيتيان

غايدخل اللاعب المغربي الشاب بنجامين بوشواري، تجربة جديدة المسار ديالو الإحترافية حيث غايلعب فالدوري الفرنسي إبتداء من الميركاتو الصيفي الجاري، من بعدما تعاقد مع فريق سانت إيتيان.
وغايحمل المغربي بوشواري لي كيلعب فمركز وسط الميدان، القميص ديال فريق سانت إيتيان انطلاقا من الموسم الرياضي لي جاي وإلى غاية عام 2025، وغايلبس الرقم 6 فالظهر ديالو مع الفريق الفرنسي.
بنجامين بوشواري لي عندو 20 سنة، انتقل لفريق سانت إيتيان قادما من فريق "رودا جي سي" الهولندي، مع العلم أنه اختار يلعب مع المنتخب الوطني المغربي وهو لاعب ديال فئة أقل من 23 سنة فليكيب ناسيونال ديال المغرب.
وكايعرف هذا الموسم تواجد كبير ديال الدوليين فالدوري الفرنسي لكرة القدم لي أكدوا مع الانطلاق ديال الجولات الأولى على أنهم جايين مثلو بلادهم أحسن تمثيل فالبطولة الفرنسية والحديث هنا على كل من أشرف حكيمي مع باريس سان جيرمان وأشرف داري مع بريست وسفيان بوفال مع أنجي إضافة إلى أسماء أخرى كاوناهي وابوخلال.