السپور مافيه عداوة.. المغربي أشرف داري والجزايري يوسف بلايلي صحاب فالغربة

تشكلت علاقة صداقة وطيدة ما بين الدولي المغربي أشرف داري النجم الجديد لنادي بريست الفرنسي والزميل ديالو فنفس الفريق اللاعب الجزائري يوسف بلايلي، حيث ولاو المتتبعين ديال داري كيشاهدوه مع البلايلي بشكل كثير.
وكشفت مصادر مقربة من اللاعب المغربي أشرف داري أن الأخير كتجمعو صداقة بيوسف بلايلي، حيث أن اللاعب الجزائر كيرافق النجم الودادي السابق فأي مكان كيمشي له سواء بالنادي أو فالمدينة، باش يسهل عليه التأقلم ويخفف عليه الغربة، ويكون فجنبو فحالة ما احتاج شي حاجة خصوصا وأن داري ما عندوش وقت كبير باش إلتحق بالفريق الفرنسي، فالوقت لي البلايلي كيعرف بريست بشكل أفضل بحكم أنه كيعيش فالمدينة الفرنسية منذ أشهر، من بعدما انتقل للدوري الفرنسي فشهر فبراير الماضي.
أشرف داري لي توج بألقاب كثيرة مع الوداد الرياضي، واخرها البطولة والعصبة، وصل قبل أسبوع لفرنسا وكانت عندو 24 ساعة فقط، على التحاقو ببريست باش يلعب أول ماتش ليه مع الفريق الفرنسي، فمواجهة ودية، وهي المواجهة لي لعب فيها داري الجولة الثانية وتألق بشكل لافت الأمر لي جعل المتتبعين ديال فريق بريست الفرنسي ينوهو بمستواه.
بدورو مدرب بريست دير زاكاريان و فأول تعليق له على مستوى "ولد الحمرا" أشرف داري، أشاد بالأداء ديالو وقال على أنه لاعب عندو السرعة، وقوي فالالتحمات والثنائيات، وأكد على أنه ما غيلقاش مشكل في الفريق حيث عندو قابلية سريعة للاندماج مع المحيط ديال النادي والدليل هو أنه لعب مباراة مع بريست من بعد الوصول ديالو لفرنسا بحوالي 24 ساعة فقط، مع العلم أنه لأكثر من 15 يوم ما لعب حتى ماتش.