بوفال رجع بقوة فأول ماتش ليه بعد الإصابة وهادي مزيانة للمنتخب

رجع الدولي المغربي سفيان بوفال للميادين، من الغياب ديالو من شهر أبريل الماضي بسبب الإصابة، ونجح فالتألق من أول ماتش ليه مع الفريق ديالو أنجي الفرنسي فالبطولة الفرنسية.
وفالوقت لي كان فريق انجي خاسر فالماتش ديالو مع فريق اوكسير الفرنسي فالجولة الثانية من البطولة الفرنسية بهدفين مقابل هدف واحد، قام المدرب ديالو جيرالد باتيكل بتغيير فالدقيقة 70، ودخل سفيان بوفال لي كان حاسم.
النجم المغربي بوفال تمكن فالدقيقة 77 باش يهدي تمريرة الهدف للزميل ديالو أمين سلامة، لي استغل هاذ الكرة وسجل من خلالها الهدف ديال التعادل لفريق أنجي، وانتهى الماتش ما بين الفريقين بالتعادل هدفين لكل فريق.
هاذ العودة الجيدة ديال سفيان بوفال من الإصابة لي حرماتو من المنتخب الوطني المغربي فالمباريات الماضية، غتخلي الجمهور المغربي يرتاح ويكون مطمئن عليه قبل حوالي 3 أشهر من إنطلاق كأس العالم المقبل فقطر، حيث كانوا المغاربة خايفين ما يكونش بوفال مع ليكيب ناسيونال فالمونديال، لكن لحسن الحظ فاللاعب قدر يستاجب بسرعة مع العلاج والبرنامج التأهيلي ورجع بسرعة وهذا ربح بالنسبة للمنتخب وللفريق ديالو أنجي الفرنسي.