بنيتة صغيرة انتاقمات من لفعة ضرباتها فشنايفها وناضت عضاتها حتى ماتت – تغريدة وتصويرة

بنية صغيرة ففيلاج "كانتار" نواحي منطقة "بينكَل" شرق تركيا انتاقمات بطريقتها الخاصة من لفعة عضاتها، ناضت حتى هي عضاتها وخشات فيها سنانها حتى ماتت اللفعة، على حسب ما قال جورنال "The Sun" البريطاني.
البنيتة اللي عندها غير عامين، كانت، نهار 10 غشت، كتلعب فالجردة ديال دارهم وبانت ليها لفعة، فيها تقريبا شي نص ميترو، وشداتها كتلعب بيها قبل ما تعضها فشنايفها، وهي من جيهتها ما طلقاتهاش حتى رجعات ليها العضة وقتلاتها.
الجيران وعائلة هاد البنيتة سمعو لغوات ديالها وخرجو لقاوها مزال شادة اللفعة بفمها، ومن بعد إسعافات اولية بسيطة هزوها لصبيطار فالمنطقة، والأطباء قالو أن صحتها مزيانة ولاباس عليها، من بعد 24 ساعة ديال العناية الطبية.