الطاس باغي ينظيم دوري "عبد الرحمان اليوسفي"

كتسعى إدارة فريق الاتحاد البيضاوي لتنظيم النسخة الثانية من دوري الراحل عبد الرحيم اليوسفي، وهاذشي خلال الأيام المقبلة من مرحلة الاستعدادات الصيفية للموسم المقبل.
وكشفت مصادر جيدة الاطلاع على أن إدارة الاتحاد البيضاوي الفريق ديال الحي المحمدي عندها رغبة فتنظيم دوري عبد الرحمان اليوسفي لي كيتعتبر واحد من رموز الحي المحمدي فمدينة الدار البيضاء، وكاين مقترح باش يتم توجيه الدعوة لمجموعة من الفرق الوطنية إلى جانب الطاس للمشاركة فهاذ المحطة الإعدادية.
ومن بين الفرق لي كترشحها إدارة الاتحاد البيضاوي للمشاركة فهذا الدوري الودي الاعدادي لي غيتقام بالدار البيضاء، كاين فريق الوداد الرياضي بطل المغرب وبطل إفريقيا وفريق أولمبيك خريبكة وفريق الدفاع الحسني الجديدي إلى جانب أندية أخرى غيتم الكشف عليها فالأيام المقبلة.
للإشارة فالراحل عبد الرحمان اليوسفي لي كيتعتبر من رجال الحركة الوطنية ومؤسسي وزعماء حزب الاتحاد الاشتراكي والوزير الأول الأسبق، حضر فالنسخة السابقة من الدوري لي كيحمل الاسم ديالو وهادشي سنة 2019، قبل الوفاة ديالو سنة 2020.