دارها الحب.. كيفما ذكر "كود" بنشرقي سينا مع الجزيرة الإماراتي على قبل حبيبتو

تأكد رسميا توقيع الجزيرة الإماراتي مع الدولي المغربي أشرف بنشرقي اللاعب ديال الزمالك المصري، وهو الخبر لي كانت كود نشراتو قبل أيام وطبعا كانت أسباب شخصية وراء اختيار اللاعب المغربي للبطولة الإماراتية.
الجزيرة الإماراتي وقع مع أشرف بنشرقي عقد ديال مدة عامين، فصفقة انتقال حر من بعدما كان العقد ديالو انتهى مع الزمالك المصري مع نهاية منافسات كأس مصر، وهو آخر لقب توج به بنشرقي مع الفريق المصري وكان هو مسك الختام ديالو معاه.
طبعا المقابل المالي لي غيربح بنشرقي من هاذ الصفقة مهم لكن ماشي بوحدو لي كان عندو أهمية بالنسبة له، فكيفما كانت كشفت مصادر "كود" من قبل، فالجانب الشخصي والعاطفي كان عندو دور كبير فاختيار أشرف بنشرقي يلعب فالبطولة الإماراتية.
بنشرقي فضل يلعب فالإمارات على مجموعة من العروض لي تلقاها من فرق أخرى، وكانت من الناحية الإحترافية والمالية أهم وأفضل، لكن ولد المغرب كانت حياتو الشخصية أهم بالنسبة له، وفضل يكون قريب من الصديقة ديالو ليناوي يتزوج بها عما قريب.
فالحب كان عندو تأثير كبير على اختيار بنشرقي لفريق الجزيرة الإماراتي، وطبعا ماشي الحب ديال الفريق الإماراتي وإنما الحب ديال رفيقة الدرب ديالو المقيمة فالامارات، وليعندو رغبة باش يتزوج بها ويدخل معها للقفص الذهبي وهو العامل لي سهل على الجزيرة الإماراتي يفوز بالصفقة ديال أشرف بنشرقي.