بنكيران لوزير الداخلية: ما قابلينش اللي وقع فالانتخابات الجزئية وما غادينش نسكتو وخاص الانتخابات تعاود

قال عبد الاله بنكيران الامين العام لحزب العدالة والتنمية البارح فتجمع بمكناس ان حزبو ما قابلش نتائج الانتخابات الجزئية ليوم 21 يوليوز 2022 اللي دارت فمكناس والحسيمة. وخاطب وزير الداخلية عبد الوافي لفتيت فهاد السياق وقال ليه باللي هاد الشي اللي وقع فالانتخابات ما قابلينوش وما غادينش نقبلوه
كما اكد ان حزبو ما غاديش يسكت وغادي يحتج على ما شهدته هاد الانتخابات وطالب باش تعاود للي دارت فمكناس.
وكان بيان للحزب بمكناس قال ان هاد الانتخابات عرفات خروقات خاصة فجماعات قروية كجماعة الدخيسة واكد انه تم "تهديد وطرد عدد من مراقبي الحزب من مكاتب التصويت قبل الشروع في فرز الأصوات من طرف بعض أعوان السلطة" وما تسلماتش "عدد من المحاضر الفرعية للمراقبين"..
وكانت الانتخابات عرفت فوز التجمع الوطني للاحرار بالمقعد بعد تحالف مع عدد من الاحزاب