العافية شعلات فعدد من الغابات فبلادنا والصهد ساهم فانتشارها.. كاينة اللي طفاوها وكاينة اللي مزال شاعلة وطيارات "كنادير" تدخلات فهاد البلايص

عرفات غابة "ملو أوغيلاس" اللي كاينة فالجماعة القروية الصميعة بمدينة تازة، منذ الساعات الأولى من صباح اليوم الخميس، حريق مهول نوض الرعب والهلع بين سكان المنطقة، فالوقت اللي مزال المجهودات متواصلة باش تطفا هاد العافية التي تسببات فخسائر مختلفة.
وقبل 48 ساعة شهد جبل "أمزيز" القريب من دوار "نفزي" بمدينة وزان حريق كبير مزال الأسباب ديالو مجهولة، وحلت صباح اليوم الخميس عناصر من القوات المسلحة الملكية من أجل المساهمة في إطفاء هاد العافية.
وبمدينة العرائش شهدت منطقة "أهل سريف" عافية كبيرة بقات مستمرة لساعات طويلة، وتدخلات عناصر الوقاية المدنية باش تطفيها، والحرارة المفرطة ساهمت في انتشار هاد العافية بشكل كبير.
حريق وزان، حسب المعلومات اللي توصلات بيها "كَود"، تسبب فخسائر مادية وهلك أكثر من 200 كتهار، وتدخلات عناصر الوقاية المدنية والدرك الملكي اللي لقاو صعوبة كبيرة باش يطفيو العافية فهاد الصهد اللي كاين فالمنطقة.
وعلمت "كَود" أن السلطات فالعرايش قررت توقيف حركة السير بالطريق السيار بين العرايش والقنيطرة بسبب الحريق المتواصل بغابة "خميس الساحل" وغابة "لايبيكا"، فالوقت اللي مزال المجهودات متواصلة باش تطفا هاد كل هاد الحرائق، كما تمت الاستعانة بطائرات الإطفاء من نوع "كنادير".