"خلوة الهرهورة" مزال منوضاها ف"الاستقلال".. برلماني ومفتشي الحزب فالشمال: كنرفضو داك الاجتماع وحنا واقفين مع بركة

حزب الاستقلال مازال كيغلي بسبب "خلوة الهرهورة" اللي سالات بدعم نور الدين مضيان باش يرجع للمقعد البرلماني ديالو اللي تلغى ليه بقرار صادر عن المحكمة الدستورية.
برلماني ومفتشي وأعضاء اللجنة المركزية لحزب الاستقلال بجهة طنجة – تطوان – الحسيمة دارو البارح الجمعة اجتماع، وأكدو فيه على محورية مؤسسة الأمين العام للحزب.
هاد الاستقلاليين أكدوا أيضا فبلاغ ليهم، توصلات بيه "كَود"، على دعمهم الكامل للأمين العام نزار بركة، ورفضو فنفس الوقت لمخرجات ما سمي ب"خلوة الهرهورة"، مؤكدين على التعبئة من أجل الإعداد للمؤتمر العام العادي 18 للحزب، عبر تفعيل مقتضيات النظام الأساسي للحزب.