دوز نهارو "مجلوق" بحال الهومليس.. ولي عهد بريطانيا كيبيع المجلات فشوارع لندن – تغريدة وفيديوهات

ولي العهد في بريطانيا الأمير ويليام دار تجربة استثنائية بعدما خرج كيتسركل فشوارع لندن وبدا كيبيع فمجلة "بيكَ إشيو" (The Big Issue) اللي معروفة كيبيعوها غالبا ال"SDF" (المشردين) فبريطانيا باش كيضبرو شوية مصيريف ب"عرق أكتافهم" بلا مايبقاو معولين غير على السعاية والجقير.
الأمير ويليام ولد الأميرة الراحلة ديانا، وخا حاول يبدل فاللوك واللبسة ديالو، ولكن ورقو واحد من الناس فالشارع وتصور معاه وشرا من عندو المجلة، ومن بعد بارطاجا القصة على موقع "تويتر".
وهضرات وسائل إعلام عالمية كثيرة أيضا على هاد ليسطوار، ونشرات جريدة "التلكَراف" البريطانية فيديو حصري للأمير وهو فالشارع مع عدد من المواطنين.
مكتب التواصل الخاص بالأمير ويليام ما هضرش على الموضوع، فحين أن بزاف ديال المتتبعين ف"تويتر" قالو أنها ماشي هادي هي المرة اللولة اللي كيخرج فيها الأمير للشارع وكيمارس مهن ديال الطبقة الفقيرة وبعض الأعمال الخيرية وكيتقرب من الناس البسطاء.