عندها 15 لعام.. بنت صومالية صفاتها لشيفور "توك توك" مصري اختاطفها وحاول يغتاصبها

درية صومالية عندها 15 لعام صفاتها لشيفور "توك توك"مصري، فمدينة 6 أكتوبر بمنطقة الجيزة، بعدما حاول يغتاصبها وهددها بجنوية.
البنت الصومالية جات لمصر باش تقلب على فرص أفضل للقراية، وكانت راكبة مع شيفور "التوك توك" باش يوصلها للدار فين ساكنة، ولكن دوزها عنوة من طريق خاوية مافيها حد وحاول يتعدا عليها جنسيا ولكن قدرات تدافع على راسها وحيدات ليه الجنوية اللي كان هاز وضرباتو بيها فصدرو.
الدرية مشات من بعد قدمات راسها للبوليس وخدات معاها محامي من مفوضية اللاجئين فمصر، وداوها دارت تمثيل الجريمة ولكن باقين شادينها قالك على ذمة التحقيق لمدة 4 أيام أخرى حتى توصل النيابة العامة لتفاصيل الواقعة بعدما طلبو محتوى كاميرات المراقبة الللي كاينين فالمنطقة ومزال كيتسناوه، هادشي وخا كلشي باين، كيف قالو متتبعين تفاعلو مع هاد الحادثة عبر مواقع التواصل الاجتماعي، وأن البنت كانت فحالة دفاع عن النفس، اللي من حقها، قدام وحش اختاطفها وكان ناوي يتكرفس عليها وصدق مقتول.