بعد العرس خدا منها الذهب وفدان ديال الأرض وطوموبيل.. مرا انتاحرات بسباب راجلها الطماع

نزلات المحكمة فالهند على راجل ب10 سنين ديال الحبس بعدما تسبب فانتحار مراتو بسباب خلاف بيناتهم على المهر والهدايا اللي خداوها من عائلتها.
شبكة "CNN" الميريكانية قالت بللي المحكمة المحلية فولاية "كيرالا" الهندية، أكدت أن الزوج مذنب بموجب قانون "وفيات المهور" الهندي، واللي كيسمح بإدانة الرجال إيلا تسببو فموت عيالاتهم فالسنوات السبعة اللولة من الزواج.
المهور والصداق فالهند، هو تقليد ماشي قانوني لكنه عرف شائع بين الناس وتوارثوه من بكري حتى هوما، وفيه كادوات العرس اللي كتعطيها عائلة العروسة لديال العريس.
الضحية كانت عائلتها عطات للعريس مهر ب100 بياسة ذهبية وفدان ديال الأرض وطوموبيل، ولكن المجرم قال بللي الموديل ديالها ماعجبوش وماقابلوش ودار لمراتو القوق، واضغط عليها باش تزيد تعطيه هدايا أكثر وهي قررات الانتحار مع الأسف.