بالتصاور. فخر المغرب اشرف حكيمي عقد المكبوتين بسباب صورة مع مراتو الفنانة هيبة ابوك.. صحافي الجزيرة ناصر رجعو بلا خبار "كيمثل صورة المغربي المسلم" وصحافة فرانسا كتهدر على الشوفة الحنينة والحب

المغربي عبد الصمد ناصر اللي خدام عند القطريين اللي ولاو لواء التخونيج فالعالم ناض بلا حيا بلا حشمة كيسب فسيدو حكيمي. كتب هاد الصحافي اللي غيراتو "الجزيرة" ودعشاتو فدماغو "وا اسفاه عليك يا اشرف حكيمي" علاش هاد الاسف؟
حقاش النجم المغربي كان فطابي روج فالدورة 75 الثلاث 24 ماي 2022 وحضر فيلم "لينوسانت" للمخرج لوي جاريل واللي تقدم "خارج المسابقة"٬ وكانت معاه مراتو الفنانة هيبة ابوك. قال المغربي اللي غيرات دماغو "الجزيرة" "ما شهدناه في مهرجان كان لن يأت به قبلك اي لاعب في تاريخ منتخبنا الوطني"
وزاد هاد المتخلف ثقافيا "انت تمثل صورة المغربي المسلم وصورة منتخب المغرب طالما احترم لاعبوه قيم الشعب الذي يمثلونه". دابا هادا رجعو بزز كيمثل شي حاجة ما عمرو قال حكيمي باللي كيمثلها.
هنا كاين مشكلة ثقافية كبيرة بين جوج عقليات. عقلية عاشت وتزادت فبلاد الحريات. حكيمي اللي تزاد فمدريد وعقلية عايشة فقطر وباغية تجيب طباع هاد الدولة للمغرب. حكيمي جيل جديد بحالو بحال هيبة اللي اصلها تونسي. للاشارة باش يعرفها هاد الصحافي باللي هيبة فنانة كبيرة فاسبانيا وكتخدم دابا ففرانسا. راقصة معروفة. باش نعطي لهادوك لمكابيت صورة على نجوميتها. راه جريدة "الباييس" العريقة سبق ليها ودارت معاها اكثر من حوار وهدرات علي اعمالها الفنية.
شوفو الفرق بين هاد الكتابة اللي كلها كبث حقاش جسد الفنانة الرشيق استفز غزائزو بين جريدة فرنسية متخصة فالتبركيك. "بوبليك" كتبات "متيم بصاحبتو٬ اشرف حكيمي تبوزا للمصورين. كان حنين وهو كيشوف فهبة. كان لابس "بالمان" وتلاقاو مع المصمم اوليفر روستاين فعشا مجهد".
هاد الغرب كيهدر على نظرات الحب والعشق وهاد مكابيث المغرب والمشرق كيشوفو غير الجسد. شوفوه وتمتعو بيه راه جسد واعر بصاح لفنانة واعرة ومع لعاب استثنائي
ثم حاجة اخرى٬ راه حكيمي كيمثل ماركة عالمية فاللبس. طبيعي خاصو يحضر لمناسبات كبيرة. حضر وجات معاه وبان واعر وبزاف